أخترعنا الطنبور و الديكتاتور شعر : محمدعبدالعليم

أخترعنا الطنبور و الديكتاتور شعر : محمدعبدالعليم






اخترعنا الطنبور والديكتاتور

شعر : محمدعبدالعليم

ليه بنحس

إحنا بس

اللى اخترعنا

الطنمبور و الديكتاتور

فى الضلمة مش في النور

ولا حد فينا عالم أو متعلم

ولاحد فينا حارب ولا سلم

الكل خرس ولا حد بيتكلم

أكبر ما فينا

حمار وتور

لكن اخترعنا

الطنمبور و الديكتاتور

هو اختراع.. واللا زرعة ..لازم ..لها بذو ر؟

تطرح بدال الورد شوك

وبدل الغصون والثمار

تطرح سجون ودمار

وتبص فى المرايا

تلقى عار

قدامى وورايا

بالليل وبالنهار

أمة كاملة

تموت

وفي سكوت

تنهار

ويقولوا عظيمة وكريمة

ونصدق كذب الأشرار

ونمشى وراهم للعار

وندوس على جثث الأحرار

ونعدى الجنة للنار

ونهتف هتاف

الجنون

ونخاف

نبات فى السجون

وتهون علينا الخيانه

أكمن نفوسنا جبانه

نبيع أغلى أمانه

وطن وعيال وأحلام أجداد

نرمي دا كله فى البحر والترع الناشفه

وصحاب وحبايب قدام وجداد

نقتلهم بالجوع بالبطاله بالسياسات الهايفه

ويعيش الاختراع الوطني

الطنمبور

والديكتاتور

ولف البقره حوالين التور

في الأرض البور

الارض البور

مافيها عصفور

كل مافيها

سباع ونمور

تعيش في الضلمه

وتكره النور

في الأرض البور

ما فيهاش نحل

ولا دبور

فيها السحل

دور ..ورا ..دور

فيها القتل

والديكتاتور

المنصور

على الجمهور

المقهور

الديكتاتور الوطني حبيبنا

اللى ما راضي لحظة يسيبنا

اللى بيفرح في تعذيبنا

واحنا نسقف

نهتف نحلف

ولو نتشاقى

ونزيد ونخلف

يربينا ويأدبنا

ويعذبنا ويهذبنا

ما هو حبيبنا

وبالكرباج عساكره تضربنا

أو تشطبنا

من التموين

وتزود سعر البنزين

عشان يحلبنا

ما هو حبيبنا

ولو يضربنا

ويعذبنا ما هو دا نصيبنا

ومكتوبنا

نحبه كتير ويعذبنا

ويقلبنا ويسرقنا

ويحرقنا

ما احنا زباله

وزفت وطين

وعرقنا

عرق صعايده وفلاحين

وديكتاتورنا

حبيب الملايين

لا يحب صعايده

ولا فلاحين

ولا له مله

ولا له دين

أصله جبله

شبه القله

المصنوعة م الطين

الديكتاتور جامد ومتين

يعيش ايام وسنين و شهور

على دم الشعب المقهور

ويدوم قرون و دهور

والجمهور ساكت ما يثور

ويعدى جبال الظلم

ويشعلل البحوربالعلم

ويدوس رؤوس الديكتاتور

ولو في الحلم

والكل فداه

لو يلقاه

شجاع بالعلم

لكن اختراعنا

زى قراعنا

سم في سم

فى سم

والكل اتسم

بالغم بالهم

بصمت الفم

وفي حرق الدم

الصمت أهم

والحلم إن عم

ديكتاتورنا

يخاف يتلم

والناس تتكلم

بلسان الذم